Ginakasubo sang Alliance of Concerned Teachers – Negros Island Region Union nga mahibaluan nga wala sang natalana nga budget para sa hiring sang bag-o nga teachers sa proposed 2027 National Expenditure Program (NEP) karun nga ginasaulog ang Teacher’s Month.
Sa interview sang Bombo Radyo Bacolod kay ACT-NIR Union Secretary-General Grace Abellar, may 14,274 pa nga kulang sa mga manunudlo, nga amat-amat nga ginapanubo sa nakaligad nga mga tinuig bangod wala sang kapasidad ang gobyerno nga ini ang tingob nga mahire.
Gani nakibot sila sang mahibaluan nga sa budget cut para sa edukasyon, kalakip sa gindula ang para sa hiring sang new teachers.
Nahibaluan nga nagdangat sa P1.01 trillion ang budget sang Department of Education subong nga 2026, apang ini ang ginpanaog sa P973.40 billion para sa masunod nga tuig.
Suno diri, ang tema sa Teacher’s Month amo ang “Teacher, ikaw naman” apang para sa iya mas nagakaigo ang “Teacher ikaw naman salo sa kakulangan sang gobyerno.”
Panindugan niya nga para mahatag ang kalidad nga edukasyon, dapat mapanubo ang class size sang kada manunudlo nga sa karun yara sa 40 tubtob 50 students sa kada klase, kasubong man ang paghire sang dugang nga manunudlo.
Kwestyon nila kun ngaa wala nahatagan sang budget ang programa, apisar nga santo sa layi, ang edukasyon ang nagapanguna nga dapat prayoridad sa budget.
Dugang pa nila nga sa Academic Recovery and Accessible Learning (ARAL) Program sang DepEd, may gindalana nga P8.9 billion nga pondo para sa pag-hire sang mga tutor.
Apang sa ulihi, ang pagtutor ang ginpasalo man gihapon sa mga manunudlo, kag wala na mahibaluan kun sa diin nagkadto ang P8.9 billion, apang ginatuyo pa nga ang budget sa programa ang pasakaon sa P11 billion.
Dugang pa sini ang Bagong Laptop para sa Teachers program, nga ginpinsar nila nga para sa tanan nga manunudlo, apang pahayag ni Education Secretary nga pili lamang ang mahatagan.
Sa pagdula sang budget sa hiring sang manunudlo, madamo man sang mga nagaparanking nga education graduate nga kada tuig nagahulat nga makasulod sa public schools ang liwat naman nga mapaslawam sa 2027.
