“Hindi papayag na may pondo sa kurapsyon, pero wala sa edukasyon,” ini ang panawagan sang National Chairman sang Alliance of Concerned Teachers sa pagsaulog sang Teacher’s Day.
Ini kasunod sang pagtambong ni ACT National Chairwoman Ruby Ana Bernardo sa ginpatigayon nga Teacher’s Day celebration sa SM City Bacolod.
Sa interview sang Bombo Radyo Bacolod, ginpahanumdom sini nga “Teacher Ikaw Naman” ang tema sang subong nga tuig nga Teacher’s Day, gani dapat ang mga manunudlo naman ang ulikdon sang gobyerno.
Kadungan sa pagtamyaw sa kaangay nga mga manunudlo kag school personnel, ginapanawagan niya sa mga manunudlo ang padayun nga pagpakigbato sa ila madugay na nga panawagan.
Kalakip diri ang pagpasaka sang entry level salary sa P50,000.
Kasubong man ang pagpasaka sang Personnel Economic Relief Allowance (PERA) sa P5,000.
Suno kay Bernardo, ang P2,000 nga PERA ang umpisa pa nga ginpatuman sang 2009.
Sa Congressional Budget Hearing, ini ang ginduso nga madugangan sang P500 lamang ukon katumbas sang P16 kada adlaw.
Para kay Bernado, sensilyo lamang ang ginaduso nga dugang kag kaangay nga ginabarat ang mga manunudlo.
Imbes nga ang ginapangayo nga “dugang nga sweldo,” sila ang ginahatagan sang “dugang nga trabaho.”
Suno kay Bernardo, nasaksihan niya mismo kun paano maghigugma ang mga manunudlo, gani sila ang dapat higugmaon man sang gobyerno.
Bilang kabahin sa panawagan, magapatigayon ang mga manunudlo, school personnel, kag mga nagahandom nga mangin manunudlo sang pagprotesta sa Mendiola Street sa Manila sa Lunes.
Sila ang magatipon, bilang kabahin sa pagpangayo sang pagkilala sa papel sang mga manunudlo, paagi sa paghatag sang mas maayo nga sweldo kag mga benepisyo.
Suno kay Bernardo, indi sila magsugot nga may pondo para sa kurapsyon, apang wala para sa pagtuon; kag indi sila magsugot nga may pondo sa kurapsyon, apang wala para sa salary increase kag benepisyo sang manunudlo.
