Ginalauman sang Association of Concerned Teachers (ACT) Partylist – Western Visayas nga mangin matawhay ang transition sa tion nga may mabutang na nga bag-o nga Education Secretary.
Sa interview sang Bombo Radyo Bacolod kay ACT – Western Visayas Chairman Maximo Montero, welcome sa ila ang pagresign ni Vice President Sara Duterte bilang tiglikom sang Department of Education (DepEd) bangod ini ang madugay naman nila nga ginapaabot.
Nagalaom ini nga sa isa ka bulan nga transition period sa aktwal nga pagbiya ni Duterte sa pwesto, makakita sang nagakadapat nga magabulos diri kag mangin masulhay ang transition.
Paathag sini nga kun insigida nga nagbuya sa pwesto ang Bise Presidente, mahimo may matabo nga konflikto inkaso nga indi mapasa ang importante nga mga hilikuton.
Para kay Montero, ini na ang pinaka-edukado nga desisyon ni Duterte nga nakabunot sang tunok nga ginabatyag sang education sector.
Suno diri, humalin 2022 wala gid nahatagan sang solusyon ang mga problema sa sektor kaangay sa kakulangan sang classrooms, teachers kag learning materials.
Para sa ila ang legasiya nga nabilin ni Duterte bilang DepEd Secretary amo ang asod-asod nga red tagging sa ACT partylist.
Wala man nila nabatyagan nga nagdampig ang bise presidente sa panawagan sang mga manunudlo sa pagpasaka sang sweldo kag mga benepisyo.
Sa baylo ang gintutukan sini amo ang mahatagan sang confidential kag intelligence funds ang iya opisina.
Ginalantaw sang mga ini nga ginagamit lamang ni Duterte ang DepEd para sa iya political gain, apang ini ang failure.
Dugang pa sini nga bisan ang Matatag Curriculum agenda ang problematic man.
Magluwas sa red tagging makabig man nga legasiya ni Duterte sa DepEd ang Confidential and Intelligence funds kag ang paggastos sang balor P125 million sa sulod lamang sang 11 ka adlaw.// Suno diri, imbes hatagan solusyon ang problema sang Pilipinas mas ginauna pa sang mga ini ang pagpreparar sa 2028 National Elections.
