Nagapanawagan ang Chairman sang Alliance of Concern Teachers Western Visayas nga matalupangdan ang panawagan sang sektor sang edukasyon sa World Teacher’s Day bwas Oktubre 5.
Sa interview sang Bombo Radyo Bacolod kay Maximo Montero, kaangay sa ila mga panawagan nakaligad nga tuig, amo gihapon ang ila mga ginahingyo ilabi na nga ini ang wala man ginahatagan pagtamod sang gobyerno.
Suno diri, kun may-ara man sang nangin solusyon sa problema, ini ang tuman ka minimal.
Kalakip sa padayun nga ginasinggitan sang mga manunudlo ang pagpasaka sang sweldo sang entry Salary level sa P50,000 kag P33,000 naman para sa mga non-teaching personnel.
Sa baylo, ang gin-aprubahan lamang amo ang Salary Standardization Law nga nagahatag sang salary increase nga P1,500 kada bulan, ukon katumbas sang P50 kada adlaw.
Panindugan ni Montero nga ini ang indi gihapon makabatak sa mga manunudlo sa poverty threshold kag ini ang mabuhinan pa sang mga taxes, kag iban nga government dues.
Apang ginalantaw sini nga indi mapatuman sang gobyerno ang ginapangayo bangod sa kakulang sang budget.
Ini bangod imbes nga 6 percent sang Gross Domestic Product (GDP) sang pungsod ang budget para sa edukasyon, apang tubtob sa 3 percent lamang ang ginahatag sang gobyerno.
Samtang ginapanawagan man nila nga ipatas ang sweldo sang mga private school teachers sa mga nagatudlo sa pampubliko nga buluthuan.
Dugang pa sini nga 150,000 ang mga kulang nga manunudlo, apang pipila palang ang napasulod samtang sa 250,000 nga kulang nga classrooms, ginatos lamang ang nadugang sang si Vice President Sara Duterte paang Education Secretary.
Nagmando man si VP Sara nga kuhaon ang mga ancillary works sang mga manunudlo, apang wala man sang support staff nga makasalo sang trabaho.
Indi man nila mahangpan ang pagpatuman sang MATATAG Curriculum, nga gindalian sa pagpatuman apang wala pa sang nagakaigo nga instructional materials.
Paathag ni Montero nga ang panawagan lamang nila amo ang mareview ang K-12 curriculum apang si VP Sara ang naghimo sang bag-o nga curriculum.
Indi man mapatuman ang education recovery bangod ang standard class size nga 35 ka estudyante kada classroom ang wala nagakahimo bangod sa kamatuoran nagadangat sa 60 ka estudyante ang isa ka classroom.
Kun tungaon, nagadoble lamang ang trabaho sang manunudlo apang wala man sang overtime kag overload pay.
