Ginpasiguro sang bag-o pungko nga city director sang Bacolod City Police Office nga ipadayunon sini ang tanan nga mga proyekto kag programa nga gin-umpisahan ni former city director Police Col. Thomas Joseph Martir.
Suno kay Police Col. Noel Aliño, ipadayon lamang sini sa pagpatuman ang mga naumpisahan ni Martir kag magadugang lamang ini sa mga programa nga ipatuman para sa kalinong, katawhay kag seguridad sang syudad sang Bacolod.
Suno kay Aliño, himu-on sini ang tanan kag gamiton ang iya mga eksperyensya nagikan sa Manila Police District agud nga maproteksyunan ang mga pumuluyo sa syudad sang Bacolod.
Suno diri, tinutuyo niya man nga pasangkaron ang police visibility agud nga mapunggan ang pagluntad sang pila ka krimen ilabi na ang nagakatabo sa una nga mga binulan subong nga tuig nga pagpangbilin sang utod nga kamot kag tiil sang mga tawo nga may nalakip nga mga listahan sang mga pangalan sang pila ka mga persona sa pila ka bahin sang syudad sang Bacolod.
Suno kay Aliño, mas safe ang nakabatyagan sang mga pumuluyo kun may yara sang mga kapulisan nga nakabantay sa palibot sang syudad.
Magapatuman man ini sang mga pagbag-o sa BCPO kun sa diin insaktuhan ang mga ginahimo nga sala bangud sa masami nagakaandan nalang ang paghimo sang indi husto bangud wala sang nagasita agud insaktuhon ini.
Ginpahayag man sini nga palahambal ini kag maprangka man ini nga tawo.
Suno sa iya, siya ang isa ka tawo nga nakahibalo nga magkahuya kag maglugar sa iya kaugalingon.
Si Aliño ang anay provincial director sang Iloilo Police Provincial Office.
Samtang si Police Col. Thomas Joseph Martir naman ang igabutang sa Police Regional Office 6 matapos nga ini ang natalana nga magaretiro sa bulan sang Mayo subong nga tuig.
