Dako ang pagpati sang acting director sa Bacolod City Police Office (BCPO) nga indi sa Bacolod nagakatabo ang mga pagpamatay kundi ginahaboyan lamang sang bangkay ang syudad bangod wala sang missing person nga nareport sa Bacolod City.
Suno kay P/Col. Noel Aliño, santo sa mga station commanders gikan sa Bacolod Police Station 1 tubtob sa 10, wala sang missing person nga nareport sa ila tagsa ka estasyon.
Apang wala pa ini nakontento gani ginmando sini nga magkoordinar sa mga barangay kag magpasa sang pirmado nga certification kun sa diin ini ang nakumpleto apang tubtob sa karun wala gihapon sang reported nga may missing.
Apang may-ara naman sang mga reported nga missing sa mga kaingod nga banwa kag syudad kaangay sang duha sa banwa sang La Castellana kag isa sa syudad sang Silay nga lunsay mga lalaki.
Madumduman nga duha ka bangkay ang nasapwan sa sulod sang tamburong sa Barangay Felisa sang tinalikdan nga senimana kun sa diin ang mga ini ang halos indi na makilala kag yara na sa advance state of decomposition.
Samtang may isa naman nga kasunod nga nasapwan sa Economic Highway sa Barangay Cabug kag ini ang ginkilala na sang mga ginikanan kag live in partner sini sa Silay City.
Paathag ni Aliño nga siya mismo ang nakasugilanon sa pamilya kag ginpahayag sang mga ini nga gin-abduct ang biktima sang apat ka tawo.
Dako naman ang ila nga pagpasalamat sa BCPO bangod ini mismo ang nagsugat sa ila agud mabuligan nga mabawi kag mapalubong ang bangkay.
Ginapanugyan man sang mga ini sa pamilya sang duha ka missing nga kabataan sa La Castellana nga magrequest sang DNA test kag indi na pagpaligban pa sang gasto bangod ini ang sabton na sang Philippine National Police agud mahatagan sang closure ang kaso.
Nagapatigayon naman sang 24/7 nga patrolling sa bahin sang economic highway ang Bacolod Police Station 9 kag 10 samtang may-ara man sang mobile forces nga nagapatigayon sang City Boundary checkpoints.
Magluwas diri, nagtukod man si ang acting City Director sang special investigation team nga magatutok sa mga nanligad nga insidente kaangay sang ginawigit nga mga parti sang lawas sang tawo.
Paathag sini nga tanan nga concerned Police Stations ang ginpahatag na sini sang update kag progress sa imbestigasyon.
