Nagpasalig ang acting general manager sang Bacolod City Water District (BACIWA) nga ihatag sini ang iya masarangan para masolbar ang problema sa tubig sa ciudad.
Suno kay Engr. Michael Soliva, itrabaho sini ang tanan nga dapat itrabaho kag mga kinahanglan pa gid nga itrabaho para sa maayo nga serbisyo sa ciudad.
Suno diri, iya ginapasalig nga kun i-implement sang insakto ang Joint Venture Agreement sa tunga sang water district kag sang PrimeWater.
Dugang pa sini, iya ginatinguhaan nga mahatgan sang safe kag supesyente nga supply sang tubig sang pumuluyo sang Bacolod.
Samtang, sa karun yara sa gihapon ang nga gamit ni anay General Manager Mona Dia Jardin sa opisina samtang si Soliva naman nagpungko sa gamay nga lamesa agud mapadayon ang trabaho sa BACIWA. Samtang, nagpatigayon sang rally ang Bacolod City Water District (BACIWA) Employees Union sa atubang sang opisina sang BACIWA kasunod sa pagkakas kay Mona Dia Jardin bilang general manager.
Madumduman nga ginkakas si Jardin matapos ang ginpagwa nga resolusyon sang board of directors sang BACIWA nga gindeklarar nga natapos ang termino sini sa ground nga loss of confidence kag siya ang ginbuslan ni Engr. Michael Soliva bilang acting general manager.
Suno kay BACIWA Employees Union president Leni Espina, para sa ila kadalag-an ang pagpakakas kay Jardin bangod isa siya sa nagperma sadto sa pagsulod sang PrimeWater sa BACIWA.
Suno kay Espina, mapadayon ang ila union bangod madamo sang nagakatabo nga wala ginapahibalo sa pumuluyo kag wala sang transparency sa tunga sang consumers kag board of directors.
Pahayag ni Espina, nagapasalamat sila sa bag-o nga board of directors nga iya ginalauman nga mahatagan man sang pagtamod ang mga empleyado kag bukas sila sa nagakatabo sa BACIWA.
