Nagapati ang acting general manager sang Central Negros Electric Cooperative nga bastante na nga tion ang 60 dias agud nga malimpyuhan ang masterlist sang mga konsumidor nga magaboto kun sila ang pabor ukon nagapamatok sa Joint Venture Agreement sang CENECO kag PrimeElectric.
Suno kay Atty. Arnel Lapore, maayo ini nga oportunidad agud nga makareach out ang CENECO sa mga konsumidor nga mangin aktibo sa ila partisipasyon kag ipa-update ang ila membership.
Ini man ang mangin kahigayunan para sa CENECO agud nga usisaon ang listahan agud nga makakas ang mga nagtaliwan na kag mabilin ang buhi.
Ginapaabot ni Lapore nga makadihon ang NEA sang design kag team sang information technology people agud nga madeterminar ang status of membership sang isa ka miyembro santo sa database.
Kun maestablish ang final nga master list kag madeterminar ang numero sang mga nagkalamatay, dako ang posibilidad nga makaapekto ini sa threshold nga luyag nila malab-ot, apang nakadepende na ini sa NEA kun ano ang ila mangin desisyon.
Suno kay Lapore, mahimo nga naghatag ang NEA sang malawig nga tion sa CENECO agud nga masala sang maayo ang masterlist.
Ginatugyan naman ni Lapore sa NEA ang pag-address sa pila ka issues sa cleansing sang masterlist kaangay sang pagpahanugot sa bata sang miyembro nga nagtaliwan na nga makaboto.
Nagalaom naman ang acting general manager nga matapos ang cleansing sang masterlist bangud preparado naman ini kag kinahanglan nalang salaon sang maayo.
