Gin-athag ni Acting Mayor kag Vice Mayor El Cid Familiaran nga wala sang intensyon ang Bacolod City nga papanaugon ang mga badjao sa Iloilo City kag tinutuyo sini kuntani nga sila ang papulion sa Mindanao.
Aminado si Familiaran nga may lapses ang mga ginpang-assign nga magpapauli sa mga badjao bangud wala sang koordinasyon sa counterpart sang Iloilo kag sa local government unit nga ginatiniran sang mga ini sa Mindanao.
Suno sa iya, makapila ka beses na nga ginpapauli sang ciudad ang mga badjao gani nagalaom ang Bacolod City Government nga nakahibalo na sila magpauli sa ila ginhalinan.
Suno diri, wala sang intensyon ang ciudad nga sayluhon sa Iloilo ang mga badjao kag wala man sang instruction nagikan sa ciudad nga didto sila manaog kag magtinir.
Dugang pa sini nga wala sang intensyon ang Bacolod City nga sayluhon ang problema sa Iloilo bangud nag-abi ini nga sila ang magapadayon sa pagbyahe padulong sa Mindanao.
Gin-athag man sini nga personal nga kwarta mismo sang mga badjao ang ila ginbayad sa ila plete sa barko.
Subong nga adlaw, may nagwa nga report nga luyag ni Iloilo City Mayor Jerry Treñas nga ideklarar nga persona non grata si Vice Mayor El Cid Familiaran bangud sa pag-abot sang mga badjao sa ciudad.
