Aminado ang Barangay Kagawad nga temporaryo nagapungko nga Punong Barangay sa Biarangay 7, ciudad sang Bacolod nga nabudlayan ini nga magserbe.
Ini bangud wala na nagtrabaho ang mga empleyado sang Barangay humalin sang tinalikdan nga adlaw.
Sa interview sang Bombo Radyo Bacolod kay Barangay Kagawad kag Acting Punong Barangay Jake Arenas, yara sila sa stage sang transistion karun kag ang kinahanglanon para diri ang ginaproseso sang Barangay.
Suno kay Arenas, stressful katama ang sitwasyon bangud magluwas nga nagbulos lamang ini, wala pa sang bilin nga empleyado sang barangay nga magabulig sa iya.
Nagapanawagan ini sa mga empleyado sang barangay nga magbalik na sa trabaho bangud wala man ang mga ini ginpanaugan sang suspension.
Ginpahayag man sini nga wala sang kamatuoran ang ginpahayag sang kampo nanday Punong Barangay Hercy Sibug nga politically motivated ang pagsuspend sa ila.
Suno kay Arenas, paano nangin politically motivated ang suspension kay nasuspend ang mga ini bangud ginpasakaan sang reklamo bangud wala nakabayad sang ila utang.
Madumduman nga gindagdagan sang Office of the Ombudsman sang tatlo ka bulan nga suspension nga wala sang sweldo sanday Punong Barangay Hercy Sibug, bana sini kag Kagawad nga si Bernabe Sibug kag Barangay Treasurer nga si Edmar Base sang Brgy. 7, Bacolod City. Ini kasunod sang reklamo nga ginpasaka sang complainant nga si Cresenciano Torres sa Ombudsman.
