Magluwas sa kalipay sa pagdeklarar nga Drug-Free sa Barangay 11, Bacolod City, nagahatag man ini sang daku nga obligasyon sa mga opisyal sa barangay.
Ginapaslig ni Loynie Grace Morales, Acting Punong Barangay, nga apisar drug free na ang ila lugar, indi naman maga-untat ang mga opisyal kag Barangay Tanod sa pagmonitor agud nga mamintinar ang status.
Ginpahayag ni Morales nga anum ang mga nangin drug surrenderee sa ila Barangay kag nadakop na ang isa sa mga ini samtang ang lima naman ang wala na sa lugar bangod indi naman orihinal nga residente sang Barangay 11.
Humalin naman sang pagka-aprubar sa deliberasyon nga Drug-free na ang Barangay 11, gilayon naman nga nagmando si Morales sa XO Tanod nga kun may magsulod sa ila Barangay nga wala naman sang importante nga buhaton, indi nalang pagpahanugutan sa pagsulod.
Paathag sini nga wala sila nagapahanugot sang standby humalin palang sang pagsugod sang pandemya.
Bangod sa wala na sang klase, nakita naman nga dyutay nalang ang mga residente sa Purok Lunok kun sa diin yara ang Cathedral kag La Consolacion College (LCC).
Samtang ginamonitor naman ang duha pa ka Barangay ilabi na ang Las Locas Hotel nga makapila na nga ginpaidalum sa buybust operation.
Paathag naman ni Morales nga indi residente sang Barangay 11 ang mga nagabuhat sang transaksyon sa hotel kundi mga naga-arkila lang sang kwarto agud nga mag meet-up.
Adlaw-adlaw naman ang ila nga pagmonitor kag shifting nga nagalibot ang mga tanod kada gab-i.
Nalipay naman si Morales nga Drug-Free na ang ila Barangay bangod para ini sa kahilwayan sang mga kabataan.
Panugyan sini sa mga pumuluyo nga padayunon ang ginahemu nga kaayuhan kag indi na kuntani pahanugutan nga magbalik ang droga bangod mangin halit ini ilabi na sa mga kabataan.
