Matawhay kag padayon ang lakat sang trabaho sa Barangay Hall sang Barangay 16, Bacolod City subong nga adlaw kun sa diin kahapon duha ang nagpungko nga punong barangay diri.
Sa interview sang Bombo Radyo kay acting Punong Barangay Stella Dela Pena, ginkakibot sini kahapon alas-9:00 sa aga sang nagpadulong si suspended Barangay 16 Punong Barangay Joseph Delos Santos agud magbalik sa trabaho kag sila man ang dungan nga nanaog gikan sa barangay hall kapin alas-5:00 sa hapon.
Apisar nga sila nga duha ang yara sa barangay hall suno kay Dela Pena wala gid sang may napirmahan si Delos Santos bangod sila ang personal nga nagpalapit sa iya nga acting punong barangay para magpapirma.
Suno diri, nakighinun-anon na ini kay Delos Santos kag iya ini ginpangabay nga indi na ini magpadulong sa barangay hall samtang ini ang suspended bangod nga tuman kasako sang trabaho kag nagalingin ang ulo sang mga tawo kun sin-o ang mapirma.
Panugyan ni Dela Pena kay Delos Santos nga kun may yara man ini sang wala maintindihan, kuntani nagdiretso ini sa Sangguniang Panlungsod agud maklaruhan ang iya mga pamangkot.
Gin-athag ni Dela Pena nga ang iya pirma ang lehitimo kag dapat nga yara sa mga dokumento nga ginapapirmahan.
Iya man ginkumpirmar nga 100 percent na ini nga handa para magpadalagan sa maga-abot nga eleksyon para sa posisyon bilang punong barangay, samtang nagpahayag naman ang suspended nga punong barangay nga wala na ini sang plano nga magpadalagan pa liwat.
