Gin-inagurahan na kaina ang fully-airconditioned activity center sa Bacolod City College nga kabahin sang mga pasilidad nga ginpatindog sang city government sa balor nga P350 milyones.
Ang 1,000-seater nga activity center ang sarang magamit para sa student assemblies, meetings kag conventions kag sporting events.
Sa interview sang Bombo Radyo kay Bacolod City Mayor Evelio ‘Bing’ Leonardia, selebrasyon man ini sang ika-25 nga anibersaryo sang pagtukod sang Bacolod City College.
Sang ginconceptualize ang pagtukod sang BCC, handom gid sini nga makaeskwela ang mga estudyante nga indi makasarang ang ila ginikanan sa kolehiyo.
Halin sang gintukod ang eskwelahan tubtub subong, naglapaw na sa 11,000 ang nakatapos sa nasambit nga kolehiyo.
Bisan 50 porsyento lang sang mga graduates ang nangin successful sa ila nga kabuhi, indi magnubo sa 6,000 ka pamilya ang nabuligan.
Suno kay Leonardia, barato ang tuition sa BCC apang dekalidad ang edukasyon diri.
Nagalaom naman ang alkalde nga mas magaimprove pa gid ang kalidad sang edukasyon sang BCC bangud mas nag-improve na gid ang mga pasilidad diri kag mahimo nga madugangan pa ini.
Ginaapabot naman suno kay Leonardia nga magdamo pa ang mga estudyante sa BCC bangud nadugangan ang pasilidad.
Suno sa alkalde, luyag niya mabatian nga ihambal sang mga graduates sa ulihi nga sa BCC gid sila naggraduate sa baylo nga BCC lang ako naggraduate.
