Vindicated si Bacolod City Lone District Congressman Greg Gasataya sa liwat nga pagbasura sang Office of the Ombudsman sa kaso nga Graft nga ginpasaka sa ila may kaangtanan sa gina-alegar anomaloso nga sanitary landfill project sang syudad.
Si Gasataya ang nalakip sa mga opisyales nga ginkasuhan sang violation sang RA 3019 ukon Anti-Graft and Corrupt Practice Act kag Grave Misconduct kaupod si Bacolod City Mayor Evelio Leonardia kag iban pa.
Sang amo nga tyempo, konsehal pa lamang si Gasataya kag Chairman sang Clean and Green Coordinating Task Force.
Suno sa mga complainant, overpriced ang bakal sang city government sang propedad sa Brgy. Felisa.
Tuig 2011 gindismiss ang amo nga kaso apang ginre-file ini sang mga complainant sang 2017.
Sa resolusyon nga ginpapanaog sang Office of the Ombudsman kag permado ni Ombudsman Samuel Martires, gindismiss sini ang nasambit nga reklamo.
Sa interview kay Gasataya, ginakabig sini nga maayo nga regalo sa iya kaadlawan ang paborable nga desisyon sang ombudsman.
Suno sa kongresista, wala sang bag-o nga ebidensya nga ginpresentar ang mga complainant sa kun ano ang ila ginpresentar sang una nga pagfile sang graft charges.
Panindugan ni Gasataya, nasunod ang husto nga proseso sa pagbakal sang pito ka ektarya nga lote sa Brgy. Felisa para sa sanitary landfill.
