Nagpanaog na sa pwesto ang administrator sang Sugar Regulatory Administration nga si Hermenigildo Serafica kadungan sang kontrobersyal nga Sugar Order No. 4.
Sa sulat nga ginpagwa ni Executive Secretary Victor Rodriguez kaina sang udto, ginpahibalo sini si Serafica nga ginabaton ni President Bongbong Marcos ang sulat ni Serafica nga napetsahan Agusto 10 effective immediately.
Si Serafica ang nabutang sa kontrobersiya kasunod sang paggwa sang Sugar Order No. 4 nga nagapahanugot sa importasyon sang 300,000 metric tons sang kalamay nga suno sa Malacanang, wala ginpahanugutan ni Marcos ang pagpirma ni DA Undersecretary Leocadio Sebastian on behalf sa presidente.
Samtang, aminado ang national president sang National Congress of Unions in the Sugar Industry of the Philippines (NACUSIP) nga nasubuan ini sa pagresign ni SRA Administrator Hermenigildo Serafica nga nangin epektibo kahapon, August 15.
Suno kay Roland Dela Cruz, masubo man apang mas maayo nga nagresign na sanday DA Undersecretary Leocadio Sebastian, SRA Administrator Hermenigildo Serafica kag Sugar Regulatory Administration (SRA) board member Roland Beltran agud nga indi na sila makaimpluwensya sa patigayunon nga imbestigasyon sa kontrobersiyal nga Sugar Order No. 4.
Nagalaom man ini nga ang ibulos nga magapungko bilang Sugar Regulatory Administrator ang unanimous nga gin-aprubahan nga magapungko kag dapat empathetic sa sugar industry kasubong man sa sugar consumers.
Nagakadapat man suno sa iya nga ibutang ang genuinely capable nga mamuno sa Sugar Regulatory Administration (SRA).
