Naobserbahan sang Armed Forces of the Philippines (AFP) ang 54 ka mga barko sang China sa pila ka bahin sang West Philippine Sea humalin sang Oktubre 20 tubtob 26, mas madamo kun ipaanggid sa 31 nga narekord sang nakaligad nga semana.
Suno kay AFP spokesperson for the WPS Rear Admiral Roy Vincent Trinidad, kalakip sa mga namonitor ang mga barko sang People’s Liberation Army, Navy kag China Coast Guard.
Sa kabug-usan, 14 ka mga barko ang namonitor sa Ayungin Shoal, 17 sa Bajo de Masinloc, pito sa Escoda Shoal kag 16 sa Pag-asa Islands.
Padayon ang tensyon sa West Philippine Sea bangud sa pag-claim sang China sa kadagatan kun sa diin may yara sang territorial kag maritime claims ang pila ka pungsod kalakip na ang Pilipinas.
Sang 2016, nagdesisyon ang arbitral tribunal sa idalom sang United Nations Convention on the Law of the Sea (UNCLOS) nga wala sang legal nga basehan sa nasambit nga convention ang claim sang China sa historic rights sa sulod sang nine-dash line.
Apang wala ginakilala sang Beijing ang nasambit nga desisyon.
