Magapadayun ang Armed Forces of the Philippines (AFP) sang ila regular rotation kag resupply (RORE) missions sa ila mga military outposts sa gina-agawan nga West Philippine Sea apisar sa mga harrasment sang Chinese.
Ginpanindugan ni AFP Chief-of-Staff Romeo Brawner Jr. nga responsibilidad nila nga maghatag sang panginahanglanon sang mga Filipino troops nga nadeploy sa nagkalainlain nga bahin sang West Philippine Sea, kaangay sa Ayungin Shoal kag Pag-asa Island.
Gani sila ang magapadayun sa resupply mission, bangod ini ang ila responsibilidad kag obligasyon kag ang tikang ang isa ka legal military operation nga ginapatigayon sa sulod sang exclusive economic zone sang Pilipinas.
Pasalig ni Brawner nga padayunon nila ang RORE missions, maritime patrols, pagprotekta sa mga mangingisda, kag pagprotekta sa resources sang pungsod.
Ini ang latest statement sang AFP makaligad sang masobra isa ka semana matapos ang engkwentro sa tunga sang Chinese personnel kag Filipino troops sa Ayungin Shoal, nga nagresulta sa pagkautod sang tudlo sang isa sa Philippine Navy personnel.
Ginbasura man ni President Ferdinand ‘Bongbong’ Marcos Jr. ang ideya sang pag-anunsyar sang schedule sang RORE missions sang Pilipinas sa BRP Sierra Madre sa Ayungin Shoal.
Ginapanindugan sang AFP nga ang Pilipinas ang may kinamatarong sa pagpatigayon sang missions sa sulod sang teritoryo sang pungsod.
Suno kay Brawner, illegal ang presensya sang mga barko sang China sa lugar, kag santo sa United Nations Convention on th Law of the Sea (UNCLOS) kag iban pa nga International Laws, indi pwede nga yara sa nasambitan nga kadagatan ang mga Chinese kag nagapangharras sa mga Filipino fishermen kag Philippine Navy vessels.
