Narecord naman sa ciudad sang Victorias diri sa Negros Occidental ang kaso sang African Swine Fever.
Sa interview sang Bombo Radyo Bacolod kay Victorias City Mayor Javi Benitez, may yara sang duha ka kaso sang ASF sa ciudad kun sa diin imbulbado ang pito ka baboy nagikan sa Barangay Anahaw, banwa sang Hinigaran nga gindala sa Victorias Milling Corporation agud gamiton sa paghimo sang ila food products.
Ang mga baboy ang ginpaidalom sa random testing para sa ASF kag nagpositibo ini sa nasambit nga balatian samtang ang isa naman ka kaso ang local case nga ginabug-usan sang duha ka mga baboy nagikan sa Barangay 5, Victorias City.
Ginmando ni Benitez nga pasanyugon pa dugang ang pagpasiguro sang biosecurity sa ciudad.
Suno kay Benitez, ang tanan nga mga apektado kag infected nga mga baboy ang ipaidalom sa culling agud indi na maglapta pa ang virus.
