Natigayon nga ma-rescue ang isa ka mangingisda sang Barangay Caliling, Cauayan, Negros Occidental nga wala gilayon makapauli sang tatlo ka matapos magpalawod sang Nobyembre 13, 2025.
Sa interview sang Bombo Radyo Bacolod kay Barangay Kagawad Erlinda Dorimon sang Barangay Caliling, ginkilala ang mangingisda kay Jolito Cario ang nagpanagat kag ginalauman nga sang November 15 ang dapat nakapauli na bangud duha lang kaadlaw ang balon sini.
Suno kay Dorimon, may una nga nagdungka nga mananagat kag nagpahayag nga may nagsunod sa ila apang indi man matumod kun si Cario ang sakay.
Wala gilayon makapauli ang mananagat bangud naabtan sang malain nga tiyempo.
Suno sa Barangay Kagawad natabuan nga nagtambong ini sang birthday kag ginpahibalo siya nga may nabilin nga mananagat kag gindumdom sini nga si Cario.
Bangud sini, ginpatawag niya ang asawa kag didto nakumpirmar nga wala ini nakapauli.
Nagmato-mato man ini sa pagpangita sang sakayan agud nga magsugat sa nasambit nga mananagat.
Ginpahibalo man sini ang Punong Barangay sang Caliling angot sa wala makapauli nga mangingisda.
Nag-umpisa sila sa pagpangita sang November 15 kag ginpahibalo man sang Barangay Kagawad ang Philippine Coast Guard substation sa Cauayan.
Nagpadayon ang ila pagpangita sang November 16 tubtob 17 kaupod ang Philippine Coast Guard, team nga gindihon ni Cauayan Mayor John Rey Tabujara kag Bantay Dagat kun sa diin nakadangat sila sa Anini-y Antique kag Hinobaan apang wala sang balita ukon impormasyon.
Kaina sang aga, ginpahibalo sila sang Philippine Coast Guard nga nasagop sang lansa nga may pangalan nga Jade nga gikan sa Barangay Cartajena, Sipalay City si Cario.
Gilayon man nila ini nga ginsugat kag ginkuhaan sang vital signs kun sa diin nakita nga mataas ang blood pressure.
Gindala nila ini sa Cauayan District Hospital agud nga madapatan sang nagakaigo nga pagbulong.
