Matapos magpanawagan pinaagi sa Kahapon Lamang Program sang Bombo Radyo Bacolod sang nagligad nga bulan sang Hulyo, magakitaay na liwat ang mag-ulutod nga masobra 40 ka tuig nga wala sang komunikasyon.
Ginkumpirmar ni Editha Diaz Bedia, nga tumandok sang Binalbagan, Negros Occidental kag yara na subong naga-puyo sa Purok Ilang-Ilang, Isulan, Sultan Kudarat nga matapos siya nagpanawagan sang Hulyo 16, gilayon nga nagkontak sa iya ang bata sang iya magulang nga si Nelia Diaz-Arroz matapos mabatian sa KLP ang panawagan sini.
Suno kay Bedia, nakakontak naman sa iya ang iban pa niya nga kautoran nga yara na karon sa Mindoro, Manila kag Ilocos.
Dako naman ang pasalamat sini sa station manager sang Bombo Radyo Bacolod nga si Bombo Mary Divine Grace M. Cuello nga isa sa mga nangin paagi agud makontak niya ang iya mga utod.
Samtang, napaluha naman ang 73-anyos nga si Arroz bangud nakakontak na sa ila si Bedia.
Suno diri, ila na ginbaton nga madugay na nga patay ang ila utod matapos nga wala na nakapauli sa Negros Occidental sang nagpadulong ini sa Manila agud magtrabaho.
Dugang pa ni Arroz nga dako na ini nga regalo sa iya sang Ginoo nga antes pa man siya mapatay, nakakontak sa ila liwat si Bedia.
Natalana naman nga magkitaay ang mag-ulutod sa Disyembre 18 diri sa ciudad sang Bacolod.
