Makalipas ang lima ka dekada, nakontak na liwat sang isa ka Negrense nga yara na subong sa La Union ang isa sa apat sini ka mga utod nga yari diri sa Negros Occidental.
Nahibaluan nga si Jocelyn Infante Munar ang nagpadulong sa La Union sang naga-edad pa lamang ini sang siyam ka tuig kag subong naga-edad na ini sang 59.
Ginbun-ag ini sa Hinigaran apang nagdako sa Himamaylan City.
Naga-edad sang 16 si Jocelyn sang nagpamana ini kag nakaangkon sang siyam ka mga kabataan.
Setyembre 15, gin-atake sang highblood ang iloy kag nasundan ini sang Nobyembre 24.
Isa sa mga handom sini samtang indi pa malala ang iya kondisyon nga makita ang iya mga utod.
Nagligad nga semana, nagpanawagan sa Bombo Radyo ang bata sini nga si Melanie Infante Munar sa kun sin-o man ang nakakilala sa mga utod sang iya iloy nga sanday Nelie, Josephine, Joemarie kag Diosdado Infante.
Sa programa nga Kahapon Lamang, ginpahayag sang isa pa gid ka bata ni Jocelyn nga si Rogine nga matapos mapalayag sa kahanginan nagligad nga semana ang ila nga panawagan, nagkontak sa ila ang pakaisa sang ila iloy nga si Evelyn kag naghatag sang impormasyon tuhoy sa utod sini nga si Nelie nga yara na karon sa Cadiz City.
Suno kay Rogine, nakakontakanay na si nanay nila kag ang ila tiya nga si Nelie.
Nahibaluan man nga may mga bata si Nelie nga nagapuyo karon sa Pasay City.
Dugang pa sini, magakitaay sila sang iya mga pakaisa sa Manila sa Disyembre 18.
Samtang, tuman naman ang kalipay ni Jocelyn nga nakontak na sini liwat ang iya magulang nga si Nelie.
Suno diri, daw kaangay lamang nga natuman ang iya nga wish sini nga Paskwa.
Wala sa gihapon nadula ang iya nga paglaom nga makit-an pa gid ang duha sini ka mga magulang nga lalaki na sanday Joemarie kag Diosdado.
Nahibaluan nga ang magulang sini nga si Josephine ang nadala sa mga napatay sa Don Juan tragedy sadtong tuig 1980.
