Nagnubo na ang numero sang aftershocks sang linog nga nagluntad sa palibot sang Bulkan Kanlaon sang Hunyo 22 sang kaagahon.
Suno kay Engr. Mari-Andylene Quintia, resident volcanologist sa PHIVOLCS Kanlaon Observatory, anom ka volcano-tectonic earthquakes ang narekord sang seismic monitoring network sa western flank sang bulkan sa nakaligad nga 24 oras samtang may isa naman ka volcanic earthquake nga nagluntad.
Suno kay Quintia, aftershock gihapon ini sang 4.7 nga linog nga nagluntad sang Hunyo 22, ala-1:01 sang kaagahon.
May yara naman sang moderate emission sang puti nga aso nga ginabanta naga-average sang 237 tons kada adlaw sang Hunyo 24.
Ang ground deformation data nagikan sa padayon nga GPS measurements nagapakita nga may yara sang slight deflation sa lower kag mid slopes humalin sang Enero subong nga tuig.
Bisan nagnubo na ang numero sang aftershocks suno kay Quintia, wala sila gihapon nagakampante sa pagmonitor sa bulkan bangud mahimo nga may magluntad nga mas mabaskog nga pagtay-og.
Sa karon, nagapabilin nga Alert Level 1 ang status sang Bulkan Kanlaon nga nagakahulugan nga yara ini sa abnormal condition kag nagsulod na sa period of unrest.
