Nagdangat tubtob sa intensity 6 ang linog nga narekord sa probinsya sang Negros Occidental kasunod 6.9 magnitude nga linog nga nagluntad sa Cebu kagab-i.
Sa interview sang Bombo Radyo Bacolod kay Darryl Aro, Science Research Analyst sang Philippine Institute of Volcanology and Seismology Kanlaon Observatory sa cuidad sang La Carlota, alas- 3:00 kaina sang kaagahon may 347 ka aftershocks nga narekord apang nagsaka pa gid ini tubtob na sa masobra 600 ka aftershocks kaina sang aga.
Suno diri, sa nagluntad nga 6.9 magnitude nga linog, nabatyagan ang intensity 7 sa Bogo City, Medellin, San Remigion, Tabuelan, Daan Bantayan kag Cebu City, lunsay sa probinsya tanan sang Cebu.
Samtang sa probinsya sang Negros Occidental naman nabatyagan ang intensity 6 sa banwa sang Murcia; intensity 5 sa banwa sang Calatrava, Hinigaran, Moises Padilla, Toboso, Isabela, San Enrique, EB Magalona kag ciudad sang San Carlos; Sipalay, Bacolod; Talisay’ Victorias; Silay, kag Escalante; intensity 4 sa banwa sang Cauayan, Ilog, La Castellana, Pontevedra, Valladolid, Pulupandan, Manapla, kag pila ka bahin sang Binalbagan kag ciudad sang Bago, Cadiz, Kabankalan, kag Sagay; intensity 4 sa iban nga bahin sang banwa sang Binalbagan; kag intensity 2 sa banwa sang Hinobaan.
Suno kay Aro, matapos ang linog kagab-i may ginpagwa nga abiso sa tusnami alert apang nabatak naman.
Panugyan sini nga indi magpati sa fake news kaangay sa mga pictures nga nagalapta nga nagmala ang dagat patimaan nga may tsunami.
Paandam ni Arro nga maghalong kag magulu-aligmat sa palibot.
Samtang, Wala sang may narekord nga major incident sa probinsya sang Negros Occidental bangod sa linog nga nagluntad kagab-i.
Sa interview sang Bombo Radyo kay Negros Occidental Governor Eugenio Jose ‘Bong’ Lacson, padayon ang ila assesment sa probinsya ilabi na sa norte nga bahin nga amo ang nag-eksperyensya sang makusog nga linog.
Suno diri, nagdesisyon siya nga isuspend ang trabaho sa kapitolyo probinsyal agud mahatagan sang tion ang mga empleyado nga mapatawhay ang ila paminsaron.
Apang, apisar nga wala sang trabaho sa provincial capitol, padayon nga magaraport ang gobernador sa iya opisina para sa tanan nga luyag mangayo sang bulig sa iya.
Ginapasalamatan sini nga wala sang major incidents nga nagluntad bangod makusog kag malawig ang linog nga nagluntad.
