Ginreklamo ang isa ka agent sang National Bureau of Investigation nga nag-eskandalo kag nagpagwa sang armas-luthang sa Steamin Mugs Restobar sa 18th Street, Barangay 4, Bacolod City, sang Nobyembre 25.
Sa interview sang Bombo Radyo kay Police Captain Glenn Montano, station commander sang Bacolod City Police Station 2, alas 11:00 sang gab-i sang Sabado, nagpadulong ang NBI agent nga si Janna Navales kaupod ang lima sini ka abyan sa restobar.
Suno kay Montano, kapin alas 2:00 sang kaagahon naghimos na kag naglakat si Navales kaupod ang mga abyan sini.
Apang makaligad ang pila ka minutos, nagbalik si Navales sa restobar kag ginpangita sini ang iya jacket kun sa diin yara man didto nabutang ang iya cellphone.
Ginpangita sini ang waiter sang restobar nga si John Carlo Jison, 20 anyos, nagpakilala si Navales nga agent sang NBI kag isa ka abogada kag iya ini ginpamangkot kun diin ang jacket sini.
Nagasabat si Jison nga wala ini nakahibalo bangod nga wala man ini sang may nakita nga nabilin nga gamit.
Bangod nga indi Kumporme si Navales sa sabat ni Jison, ginpagwa sini ang iya armas-luthang.
Suno kay Montano, wala man gintaya ni Navales ang armas sini kay Jison apang nagtuga ini sang eskandalo.
Nabatian sang manager sang restobar ang kinagamo amo nga naggwa ini kag iya nalang ginpakamaayo nga l-tskeyar ang CCTV.
Sa CCTV footage, nakita nga bitbit ni Navales ang iya jacket sang ini naghalin sa restobar.
Pahayag ni Montano, nagpadulong sa ila estasyon si Jison agud ireklamo si Navales.
Desidido man ang management sang Steamin Mugs restobar nga pasakaan sang kaso nga alarm and scandal kag threat ang NBI agent.
