“Fuel, Food and Inflation” ang nangin focus sa tatlo ka adlaw nga 35th Visayas Area Business Conference sa Bacolod City.
Sa aktibidad ang ginhost sang Metro Bacolod Chamber of Commerce and Industry, kalakip sa ginpasidunggan nga 35 Business Icons of the Visayas si Dr. Rogelio M. Florete, Chairman sang Bombo Radyo Philippines.
Sa interview sang Bombo Radyo Bacolod kay MBCCI Chief Executive Officer Frank Carbon, gintutukan sa conference ang mga mayor nga panginahanglanon sa Pilipinas, partikular na sa Visayas.
Ang aktibidad ang nagsugod sang Mayo 13 kag nagtakop kagab-i, kag ang mayor nila nga focus amo ang food security and agriculture, fuel and logistics, kag food and industry.
Isa sa ginaduso nila amo ang agro-industrialization.
Suno diri, sa karun gikan sa mga raw agriculture products, ini ang ginaderetso na sa service sector.
Panindugan sini nga mas maayo kun may manufacturing ukon food processor sa Visayas.
Pinaagi sini, ginalantaw nga madamo ang magenerate nga trabaho, makatuga sang food security, kag mas dako ang maganar gikan sa mga produkto.
Apang aminado si Carbon nga antes mapatuman ang agro-industrialization, kinahanglan man sang secured nga power supply.
Sila ang naghuman sang mga resolusyon, nga amo naman ang ila ipalab-ot sa mga ahensya sang gobyerno.
Tinutuyo nila nga mapakita ang “one visayas voice” agud mas pamatian sang mga yara sa gobyerno.
