Pabor ang Alliance of Hog Raisers Association of Negros Occidental sa plano sang Negros Occidental sang pagpatuman sang alalangay nga presyo sang karne sang baboy sa bug-os nga probinsya.
Sa interview sang Bombo Radyo kay AHRANO President Ric Lauron, ginpahayag sini nga bintaha para sa mga hog raisers kasubong man sa mga consumers kag traders kun palareho ang baklanay sa presyo sang baboy sa bug-os nga probinsya.
Suno diri, yara nalang sa P110 tubtob P115 kada kilo ang presyo sang live weight nga baboy nga anay P140 tubtob P150 kada kilo.
Ini bangud sa African Swine Fever (ASF) nga nagtuga sang dako nga kapierdehan sa mga small backyard hog raisers.
Suno diri, isa sa mga ginalantaw nga rason kun ngaa nagalain-lain ang presyo sang baboy bangud sa supply kun sa diin may adjustment nga ginahimo ang mga traders.
Dugang pa, bangud man sa kahadlok sang mga consumer nga magbakal sang karne sa mga merkado.
Ginaduso sang AHRANO nga mangin P160 tubtob P180 kada kilo ang minimum price sang baboy.
Dako nga bulig para kay Lauron kun ma-implementar ang pagpatuman sang palareho nga presyo sang baboy sa probinsya agud may standard na ang mga consumer kag makabawi naman ang mga hog raisers.
Sa kaangoot nga balita, ginatun-an pa sang probinsya sang Negros Occidental ang legalidad sang pagpatuman sang palareho nga presyo sang baboy.
Suno kay Negros Occidental Governor Eugenio Jose “Bong” Lacson, nagpatumam ang Guihulngan City sa Negros Oriental sang minimum buying price sang live hogs kag pork products agud maprotektahan ang mga hog raisers ilabi na sa tunga sang paglapta sang African swine fever (ASF).
Nabatian man niya nga may plano nga magpatuman man sang minimum buying price ang probinsya sang Negros Oriental.
Suno sa Gobernador, ginatun-an pa nila ang ini nga option sa Negros Occidental kun legal ba nga magset sang presyo agud maprotektahan ang mga hog raisers batok sa padayon nga pagnubo sang presyo sang baboy.
