Nakakuha sang atensyon ang ginhimo sang St. Peters’ Church sa Lucerne, Switzerland matapos nag-install sang AI-Powered Jesus Christ nga makahambal sang tubtob sa 100 ka lengwahe.
Ini ang ginatawag nga “Deus in Machina” nga gin-install sa confessional booth sa sulod sang simbahan sang tinalikdan pa nga Agusto 2024.
Sa tion nga magpadulong ang mga tawo sa confessional booth, makit-an sa sulod sini ang screen kun sa diin makit-an ang avatar ni Jesus Christ nga kaangay sang “hologram.”
Naka-program ang theological texts kun sa diin magahalin ang iya mga sabat.
Gina-imbitar sang simbahan ang mga bisita nga mag-atubang sa hologram ni Jesus nga nagasabat man sang real-time.
Suno Marco Schmid, isa ka theologian sa St. Peters Church, ginpahibalo na sang mga ini ang mga bisita nga AI-generated ang ila maestorya kag indi dapat sila magkumpisar ukon magbuya sang mga personal nga impormasyon.
Gin-athag man nga isa lamang ini nga eksperimento bangud luyag nga mahibaluan sang simbahan kun ano ang reaksyon sang tawo nga naga-istorya sa AI ni Jesus Christ kag kun ano ang luyag nila ipamangkot.
Sa duha ka bulan nga naga-operate ang Jesus avatar, nagdangat na sa masobra isa ka libo ang mga bisita sa simbahan kag nag-atubang sa AI-powered Jesus Christ.
