Nangin opisyal na nga couple sanday actress-politician Aiko Melendez kag actor-turned-entrepreneur Onemig Bondoc makaligad sang 29 ka tuig.
Kahapon, kadungan sa Valentine’s Day, nagpost sang sweet message si Aiko para kay Onemig, nga gintawag sini nga ‘soulmate.’
Nahibaluan nga sang Pebrero 13, ginkumpirmar sang couple paagi sa social media account ni Aiko nga sila ang opisyal na nga magkarelasyon, matapos magreconnect kag amat-amat nga ginbalik ang ila paghigugma pila ka dekada na ang nakaligad.
Kaupod sa Valentine’s Day message ni Aiko ang mga litrato nila sa nakaligad nga date kag beach trip.
Una na nga naggwa ang mga espekulasyon tuhoy sa ila relasyon sang Disyembre sang nagguest si Onemig sa vlog ni Aiko.
Sang Enero, mas nagtunog pagid ang mga espekulasyon sang nagpost litrato nga magkaupod si Aiko nga may caption nga “Happy together… after 29 yrs.”
Apang sa amo nga tion, pahayag sang duha nga wala sila nagadali kag ginklaro nga indi pa sila magkarelasyon.
Suno sa duha, wala sila sang regrets sa ila kabuhi, ilabi na nga sila ang may mga kabataan sa ila mga nangin kahagugma.
Nahibaluan nga ginkumpirmar ni Aiko sang Oktubre 2025 nga bulagay na sila ni Zambales first district representative Jay Khonghun matapos ang walo ka tuig nga relasyon.
Gin-athag sini nga wala sang 3rd party nga involved sa ila breakup.
