Indi pa makaandar ang air conditioning unit sa bag-o nga duha ka isolation kag quarantine facilities nga ginpahimo sang Department of Public Works and Highways sa Barangay Alijis, ciudad sang Bacolod sa tion nga may iquarantine diri nga COVID positive ukon ila nga close contact.
Madumduman nga sang Marso 12, ginturn-over sa city government ang 32 rooms sa Barangay Alijis kag 45 rooms sa evacuation center sa Barangay Vista Alegre.
Ang una nga 32 rooms ang nakumpleto kag naturn-over sa city government sang Oktubre tuig 2020 samtang ginturn-over naman kahapon ang dugang nga 32 rooms nga nagkumpleto sang 64-room facility.
Ang duha ka units nga pasilidad ang nagabalor sang P50 million kag ginpondohan sang DPWH.
Suno kay Bacolod City Councilor Renecito Novero, chairman sang quarantine centers action team, ginahitso pa ang pagbakal sang transformer para sa duha ka isolation units.
Santo sa memorandum of agreement sang city government kag sang DPWH, obligasyon na sang ciudad ang pagbakal sang transformer kag pagpatakod sang linya sang kuryente sa pasilidad bangud natakdan na ini sang airconditioning unit antes ginturn-over sang ahensya.
Sa karon suno kay Novero, madali nalang matapos ang bidding sang transformer para sa una nga 32 rooms samtang maulihi naman ang sa ulihi nga 32 rooms bangud ginasunod sang bidding process.
Indi pa mapaktan kun san-o matakod ang transformer sa una nga unit apang ginalauman nga matigayon ini sa masunod nga bulan.
Suno sa konsehal, sarang magamit ang isolation facilities apang magagamit lang sang electric fan sa kada room.
