Nagdangat na sa “very unhealthy” ang air quality level sa ciudad sang Bacolod bangud sa haze ukon aso gikan sa forest fire nga nagluntad sa Indonesia.
Sa interview kay Vicente Losbañes, Regional Director sang Environmental Management Bureau – Negros Island Region (NIR), ginkumpirmar sini nga yara sa 150-200 ang range sang air quality sa ciudad nga makabig nga ‘very alarming’.
Suno diri, ang normal nga air quality level ang naga-range sa 70-100.
Suno kay Losbañes nga santo sa resulta sang Particulate Matter 2.5 (PM2.5), nagdangat sa 171 ang reading sang air quality sa ciudad subong nga aga.
Kahapon, ginpahayag sini nga moderate to heavy ang air quality level sa ciudad , ukon yara sa 50–100 ang lebel apang mas nagdamol ang aso subong nga aga.
Pahayag sang EMB NIR regional director, may monitoring equipment ang EMB NIR sa Barangay Alijis kag ginahulat pa ang bag-o nga datos para sa subong nga hapon.
Sa pihak nga bahin, ginkumpirmar man sini nga “very unhealthy” ang air quality level sa banwa sang La Castellana apang may pila man ka mga area diri ang “fair” nga air quality.
Paathag ni Losbañes nga indi pa mahibaluan kun san-o mauntat ang haze bangud nagadepende ini kun san-o matapna ang sunog sa Indonesia.
Ginpanugyan sini sa mga pumuluyo ilabi na ang may mga asthma ukon respiratory disease nga magsuksok sang facemask kun maggwa.
Panugyan man sini nga likawan anay nga maglagaw kun indi man lang kinahanglanon samtang nagapadayon ang monitoring sang air quality level sa ciudad.
