Air Quality sa La Castellana, nagdangat sa “very unhealthy” level bangod sa haze gikan sa forest fire sa Indonesia

Ginkumpirmar sang bise alkalde sang La Castellana, Negros Occidental nga pila ka mga barangay sa nasambit nga banwa ang nakaeksperyensya sang pagdulom sang kalangitan tuga sang haze ukon aso nga naghalin sa forest fire sa Indonesia.

Sa interview sang Bombo Radyo Bacolod kahapon kay La Castellana Vice Mayor Rhummyla Nicor Mangilimutan, iya ginpahayag nga sa tunga-tunga sang ala 1:30 sang hapon kag alas 4:00 sang hapon, nagdulom ang palibot rason nga natabunan ang talan-awon sang mga bungyod kag Bukid Kanlaon.

Gingamit ni Mangilimutan ang iya social media channels agud panugyan sa iya mga constituents nga magsuksok sang face mask.

Partikular niya nga gin-engganyo ang mga madali mabiktima nga mga indibidwal—subong sang mga nagabusong nga mga babayi, mga lapsag, mga tigulang, kag yadtong may mga kondisyon pareho sang asthma nga magpabilin sa sulod sang balay.

Ginpahayag man sini nga ang Barangay Robles, Manghanoy, kag Mansalanao ang pila sa mga Barangay nga nakaeksperyensya sang haze ukon aso.

Ang datos nga ginpagwa sang Environmental Management Bureau-Negros Island Region nagapakita nga ang Air Quality Index nga narekord sa La Castellana nagapakita sang “very unhealthy” nga lebel sang Particulate Matter (PM).

Nagpanugyan ini sa mga pumuluyo sang La Castellana nga pamatian ang mga opisyal nga panugyan kag magpabilin nga mabinantayon agud masiguro ang ila nga safety.