BACOLOD CITY — Gin-athag sang manager sang Bacolod-Silay Airport nga ginadumilian ang pagsulod sang mga pumuluyo sa daan nga airport sa Barangay Singcang kag Tangub, ciudad sang Bacolod nga wala sang pahanugot sang Civil Aviation Authority of the Philippines.
Ini ang panawagan ni Mecine Reyes kasunod sang hingyo nila kay Tangub Punong Barangay Noli Villarosa nga pahalinon ang mga nagpatindog sang structures sa kilid sang runway.
Sa interview sang Bombo Radyo, ginpahayag ni Reyes nga wala pa sang sabat si Villarosa sa iya sulat apang sa pinakaulihi nga monitoring sang ila Civil Intelligence Agents, wala na ang structures sa runway sang paluparan.
Suno sa airport manager, kun maayo kuntani ang intensyon ni Villarosa sa pagpahanugot sa ila mga residente nga magtinir diri, kuntani nagsulat ini sa iya agud nga mapadala sa CAAP Central Office nga amo ang magadesisyon kun pasugtan ini ukon indi.
Una na nga ginpahayag ni Villarosa nga nagatinir sa lugar ang mga tanod nga nagabantay agud wala sang makasulod diri kun gab-i ilabi na kun gab-i.
Kadungan sini, tatlo na sa karun ka shifting ang gwardiya sang CAAP sa old airport agud may magabantay 24 oras.
Magabutang man sila sang paandam nga indi pwede makasulod sa lugar ang mga informal settlers.
Nahibaluan nga basta bukas ang propiedad sang gobyerno, nagaulhot ang mga informal settlers.
