Hugot nga ginamonitor ang status sang bulkan Kanlaon kasunod sa naeksperyensyahan nga maisog nga baho sang asupre sa mga banwa kag ciudad nga malapit sa bulkan.
Sa interview sang Bombo Radyo Bacolod kay Punong Barangay Joselito Martinez Jr sang Barangay Bi-ak na Bato, kahapon kapin alas- 3:00 sang hapon, naeksperyensyahan sang mga sitio sang brgy nga malapit sa 4km permanent danger zone ang maisog nga baho sang asupre.
Bangod sini, ginsuspende ang klase sa mga buluthuan nga nakapanimaho sang asupre.
Suno diri, sa bahin naman sang brgy proper, napanimahoan ang asupre kapin alas 7:00 sang gab-i samtang padayon naman nga mabatian ang pagpanaguob nga may kaupod nga pagpangilat sa bulkan.
Pahayag sang punong barangay, nakabugtaw ini kapin alas- 12:00 sang kaagahon kag ginpanilagan ang bulkan sa kabalaka sa posible nga matabo.
Ginpastandby man sini ang rescue team kag mga transport vehicles pananglitan nga may matabo.
Sa karun, maayo ang tiyempo sa La Castellana, kag kaina sang aga klaro nga makita ang puti nga aso nga ginabuga sang bulkan.
Samtang, hugot man sini nga ginapabantayan ang area nga malapit sa suba bangod sa naga ab-ab nga duta sa padayon nga pag-ulan.
Pahayag ni Martinez, may 5 years plan ang brgy sa preparedness program kun sa diin nagapadayon ang ila meeting kada quarter sa pagremind sa obligasyon sang mga nasulod sa programa.
