Nagapadayon kada adlaw ang monitoring sang disaster risk reduction management office sang Bago City kaupod ang Philippine Institute of Volcanology and Seismology (PHIVOLCS) kag Office of the Civil Defense sa aktibidad sang bulkang Kanlaon.
Sa interview sang Bombo Radyo Bacolod kay Bago City CDRRMO head Dr. Mary Jane Ortizo, kada adlaw nagapadayon ang ila nga monitoring sa bulkang kanlaon kag nagasige man sila pagwa sang mga advisories agud nga mapahibalo ang mga pumuluyo sa sitwasyon sang bulkan kag ini ang ginahimo na sang LGU, PHIVOLCS kag OCD humalin pa sang 2015.
Suno kay Ortizo, nakatambong naman sila sang pre-disaster risk assessment kaupod ang Provincial Disaster Risk Reduction Management Office (PDRMMO) kasubong man si Negros Occidental Governor Eugenio Jose “Bong” Lacson.
Suno pa diri napreparar naman sang drrmo sang Bago City ang mga facemasks kag iban pa nga food kag non food items.
Suno diri, napahibalo na ang mga pumuluyo sang mga barangay nga maapektuhan sang mga aktibidad sang bulkang kanlaon.
Suno kay Ortizo, reviewhon man nila ang ila nga contingency plan para sa bulkan kanlaon bilang kabahin man sang preparasyon sang syudad.
Suno diri ang high risks barangays sa Bago City nga maapektuhan sa tion nga maglupok ang bulkang kanlaon ang Barangay Ilijan kag Mailom bangud malapit ang mga ini sa bulkang kanlaon kun sa diin may yara sang masobra sa 12 mil ka mga residente.
Ginpahayag man ni Ortizo nga ang bulkan ang wala sang gas emission apisar nga may yara sang mga narecord nga volcanic earthquakes.
Suno pa diri ginalauman ang phreatic eruptions sang bulkan bangud nakita sa monitoring nga may yara sang nagabara sa bulkan.
Nagpasalig man si Ortizo nga ang mga pumuluyo sa high risks barangays sa syudad sang Bago ang may nagakaigo na nga ihibalo sang mga dapat himuon kag san o dapat magpadulong sa mga evacuation areas sa tion nga maglupok ang bulkang kanlaon.
