Kaso nga robbery kag violation sang Comelec Gun ban ang pangatubangon sang 45 anyos nga gina-alegar notorious nga Akyat Bahay matapos manulod sang isa ka apartment sa Barangay Taculing, Bacolod City alas-4:02 kaina sang kaagahon.
Ang suspect ang ginkilala nga si Kevin Hosaen alias Kevin, 29 anyos residente sang Purok Kingfisher A, Barangay 16, Bacolod City.
Sa interview sang Bombo Radyo Bacolod kay Police Captain Rosalino Pugoy, station commander sang Bacolod Police Station 6, sang ginsulod sang suspect ang nasambitan nga apartment, ini ang nakita sang bata sang isa sa mga nagarenta
Ang bata ang gintayaan sang suspect sang dala sini nga replika sang armas ukon hampanganan lamang nga pusil-pusil, kag ginpatudlo kun diin nakatago ang mga alahas.
Kalakip man sa gintaban sang suspect ang lisensyado nga armas-luthang sang ginikanan sang bata.
Apang sa paggwa, nasugata sang suspect sa gate ang tag-iya sang apartment.
Gilayon ini nga nagdalagan palagyo samtang ang tag-iya ang nagpangayo naman sang bulig sa mga kapulisan malapit sa area.
Nadakpan sang mga kapulisan ang suspetsado sa Sharina Heights, Barangay Taculing, Bacolod City.
Narecover sa iya paghinakop ang hampanganan nga pusil-pusil nga gingamit sa pagpamahog, ang lisensyado nga armas-luthang nga iya ginkawat, kasubong man ang relo kag pila ka mga alahas nga kinawatan.
Ang suspect lamang ang gintudlo sang bata kag tag-iya sang balay apang ginatumod pa sang mga kapulisan kun ini ang may grupo.
Ginapakamaayo naman ni Pugoy nga nadakop na ang isa sa mga gina-alegar notorious nga akyat-bahay kag natalana na nga pasakaan sang kaso nga robbery kag paglapas sa Comelec gun ban.
