Ginapasalamat sang grupo sang mga manunudlo ang pagmando ni President Ferdinand “Bongbong” Marcos Jr. nga himuon uniform nga P20,000 ang ihatag nga service recognition incentives (SRI), apang panawagan sang mga ini nga himuon tax-free ang benepisyo.
Sa interview sang Bombo Radyo Bacolod kay Grace Abellar, secretary general sang Alliance of Concerned Teachers – Bacolod City – Negros Occidental chapter, madugay na kuntani nga P20,000 ang SRI sang mga manunudlo apang ini ang wala nagakapatuman bangod sa kakulang sang budget.
Paathag sini nga ang alokasyon sang SRI ang nakadepende sa budget sang Department of Education.
Nagalaom si Abellar nga supisyente ang budget sang ahensya nga makacover sang P20,000 nga SRI.
Apang pangabay sang mga ini nga kun ihatag gid man ang P20,000 nga SRI, ini ang tax-free na.
Suno diri, nakadepende sa salary grade ang taxes bangod ini ang may ginabuhin nga percentage, gani makaluluoy ang may dako nga Salary Grade bangod dako man ang mabuhin sa ila nga SRI.
Nagalaom ini nga ilobby ni DepEd Secretary Sonny Angara kay Presidente Marcos nga himuon non-taxable ang SRI bilang pamaskwa.
Suno diri, dako gid nga bulig sa mga manunudlo ang P20,000 bangod subong nga Disyembre sila ang may mga Christmas party man sa eskwelahan, kag ini ang magamit pa sang mga manunudlo sa pangregalo sa mga kabataan.
Magluwas diri, padayun man ang panawagan sang ACT partylist nga mahatag ang madugay na nila nga panawagan nga mapasaka sa P50,000 ang entry level salary sang mga manunudlo.
