Ginrekomendar sang Department of Education (DepEd) Bacolod City Schools Division ang Alangilan National High School sa pilot implementation sang plano nga dry run para sa face-to-face classes sa Enero 2021.
Sa interview sang Bombo Radyo Bacolod kay Bacolod City Schools Division superitendent Gladys Amelaine Sales, ginpahayag sini nga nagapanghanda na sila karon sa plano nga pagpatigayon sang dry run sang face-to-face classes kasunod sang pag-aprubar sini ni Presidente Duterte sang damlag lang.
Suno kay Sales, ila napilan ang Alangilan National High School bangud nga remote area na ini kag wala sang madamo nga kaso sang coronavirus kag malayo sila sa epicenter.
Dugang pa sini nga sa pagpatigayon sang dry run sang face-to-face classes nga magasugod sa Enero 11 tubtob 23, 2021, kinahanglan ang parent’s permit kag dapat gid magsunod ang tanan sa health protocol agud malikawan ang paglapta sang COVID-19.
Suno kay Sales, indi pa man pinal ang amo nga tikang apang nagadihon na sila sang plano.
Ilabi na nga kinahanglan gid sang mga estudyante ilabi na ang yara sa secondary level kag nagakuha sang Technical-Vocational-Livelihood (TVL) strand nga kinahanglan gid sang face-to-face bisan makaisa lang ka bes sa isa ka semana para sa ila nga practicum.
Nagalaom si Sales nga mag-ugyon ang tanan sa plano sang gobyerno bangud nagapati ini nga para man ini sa kaayuhan sang tanan.
