Hulaton nalang ang ipagwa nga Executive Order sang alkalde sang syudad sang Bacolod angot sa pagpatuman sang alas 11:00 sang gab-i tubtob alas 03:00 sang kaagahon nga curfew kadungan sang pagpatigayon sang simbang gabi.
Sa interview sang Bombo Radyo Bacolod kay Vice Mayor El Cid Familiaran, EO nalang sang alkalde ang ginahulat agud nga mapatuman na ang alas 11:00 sang gab-i tubtob alas 03:00 sang kaagahon nga curfew hours humalin sa Disyembre 16 sa pagpatigayon sang simbang gabi.
Madumduman nga naghingyo ang Diocese sang Bacolod nga panubuan ang curfew hours sang syudad bangud sa patigayunon nga misa de gallo.
Wala naman ini sang problema sa bise alkalde bangud importante man ang spiritual nga obligasyon.
Nagpanugyan ini nga dapat sundon ang proper health protocol batok sa COVID-19 sa pagpatigayon sang misa.
Samtang, ginpahayag man sini nga wala man sang problema ang pagselebrar sang holidays apang sundon lang sa gihapon ang mga health protocols batok sa COVID-19 agud nga malikawan ang pagsaka sang kaso sang balatian sa syudad.
Samtang nagpanawagan man ang mga alkalde sang syudad sa mga magatambong sa simbang gabi, sa mga kapulisan kag sa pamunuan sang simbahan nga iobserbar ang health protocols agud malikawan ang pagdamo sang COVID-19 cases sa syudad.
