Ginpakigbahin ni anay 3rd District Congressman Albee Benitez nga igaanunsyar sini kun-o sin-o ang iya mga kaupod sa pagbag-o sang Bacolod sa masunod nga mga sinemana.
Madumduman nga kahapon, matapos ang ginpatigayon nga ERB hearing sa COMELEC-Bacolod, gin-anunsyar sang anay kongresista nga siya ang magapadalagan bilang alkalde sang ciudad sa 2022 elections.
Ginlaragway sini nga daw kaangay nga nalumos sa korapsyon ang Bacolod City kag bangud sa kakulang sa maayo nga pagdumala, wala nagakabatian ang tingog sang mga pumuluyo.
Suno sa iya, dapat buligan kag luwason ang ciudad gani nagdesisyon ini nga magpadalagan bilang alkalde.
Nagapanindugan man ini nga nagserbi siya bilang consultant sang Negros Occidental kag bilang isa ka consultant, yara nahamtang sa Bacolod City ang iya opisina gani sa ciudad man nagsugod ang iya journey.
Ginpahayag naman ni Negros Occidental Governor Eugenio Jose Bong Lacson nga may maayo nga intensyon si Benitez sa Bacolod.
Suno kay Lacson, nakahibalo ang anay kongresista sang iya pagaatubangon nga mga challenges sa masunod nga eleksyon apang may yara ini sang mataas nga competency kag mapisan sa iya trabaho.
Nagapati ang gobernador nga sarang nga mangin maayo nga public official si Benitez.
