Ginakasubo sang Police Regional Office 6 nga sa miyembro pa mismo sang Philippine National Police (PNP) mabatian ang alegasyon nga organized criminal organization ang ahensya.
Sa interview sang Bombo Radyo Bacolod kay Police Regional Office 6 Spokesperson Police Lt. Col. Arnel Solis, nakita sang kadam-an sa mga Pilipino kun paano nagserbe ang mga kapulisan sa pungsod.
Pasalig sini nga indi maapektuhan sang statement ni former Iloilo City Police Office Director Police Lt Col. Jovie Espenido sa Congressional hearing sang Quad Committee ang pagserbisyo sang PNP, bangod ang alegasyon ang wala man sang kamatuoran.
Aminado ini nga may pila ka mga police personnel nga nagahimo sang indi maayo kaangay sang mga engaged sa illegal nga aktibidad, apang wala man nagapabaya ang PNP Organization.
Suno diri, may-ara sang Integrity Monitoring Enforcement Group ang PNP nga amo mismo ang nagakaso sa mga police personnel nga nagahimo sang indi husto.
Ini ang kabahin man sa internal cleansing program kag counter intelligence ang ahensya nga nagamonitor sa mga PNP personnel.
