Mahimo nga magamit sa pagfile sang impeachment complaint batok kay President Ferdinand “Bongbong” Marcos Jr. kun mapamatud-an nga matuod ang gina-alegar blangko nga items sa Bicameral report sang 2025 National Budget.
Sa interview sang Bombo Radyo Bacolod kay Political Analyst Atty Jomax Ortiz, ang budget ang ginapreparar sa bulan pa lamang sang Setyembre ukon Oktobre agud ini ang matapos sa Disyembre.
Matapos mapasar sa House of Representative kag Senado ang lainlain nga version, ini ang ginatingob sa Bicameral Conference Committee nga ginabug-usan man sang mga kongresista kag senador.
Kasunod sini, ang bicameral report sang nakasugtan nga budgeting ang ipasaka sa Office of the President agud mapirmahan kag mangin opisyal nga layi.
Hinali nga matapos ang tuig kag wala pa mapirmahan sang Presidente, ang i-adoptar nga budget ang isunod sa nakaligad nga National Budget.
Suno kay Ortiz, dako nga isyu ang alegasyon sang kampo sang Duterte paagi kay Davao City 3rd District Rep. Isidro Ungab nga may-ara sang 12 ka items nga gin-aprubahan ang Bicam, apang wala sang nakabutang nga balor.
Para sa political analyst, ini ang kaangay sa pag-issue sang blangko nga cheque kag ang ginhatagan na amo ang mabutang kun pila ang balor nga iya luyag.
Apang aminado ang abogado nga ang alegasyon ang mas may bug-at kuntani kun sila ang may ibidensya ukon litrato sang bicam report.
Suno kay Ortiz, dako nga bayolasyon sa layi kun mapamatud-an ang alegasyon kag ini ang impeachable offense nga sarang magamit sang partido ni Vice President Sara Duterte agud makafile man sang impeachment complaint batok kay President Ferdinand “Bongbong” Marcos Jr.
Pahayag sang abogado nga kun may ibidensya, ini ang ipasaka sa Korte Suprema kag mahimo iduso nga makonsiderar nga invalid ukon unconstitutional ang budget.
