Handa nga magasunod sa genetic testing requirements ang Algerian boxer nga si Imane Khelif sa kondisyon nga patigayunon ini sang International Olympic Council (IOC).
Madumduman nga sa Paris Olympics 2024, nangin kontrobersiyal ang kadalag-an ni Khelif sa women’s welterweight division bangud sang gender issue sa iya eligibility matapos gin-disqualify sang International Boxing Association (IBA) sa 2023 World Championships base sa sex chromosome tests.
Sang Mayo, matapos ginhatagan sang provisional recognition sang IOC, gin-anunsiyo sang World Boxing ang mandatory sex testing sa tanan nga boksidor sa kompetisyon.
Ang World Boxing ang magakapot sang boxing events sa 2028 Olympics sa Los Angeles.
Suno kay Khelif, magapaidalom lang sia sa testing kun i-administer ini sang IOC.
Ginpanindugan man niya nga indi ini transgender kundi isa ka babayi.
Ang 26 anyos nga si Khelif ang nag-apelar sa Court of Arbitration for Sport (CAS) sa desisyon sang World Boxing nga nagadumili sa iya nga magpasakop sa mga event kun indi ini magpaidalom sa genetic sex testing.
