Ginmando ni Senate committee on women, children, family relations and gender equality chairman Senator Sherwin Gatchalian ang pagpagwa sang subpoena agud nga obligahon si anay Bamban Mayor Alice Guo nga magpagwa sang mga records angot sa nadiskubre nga check disbursements nga nagabalor sang P1.1 billion gikan sa iya nga account.
Dugang pa ni Gatchalian nga indi mapaathag ni Guo kun ang check disbursement humalin sang 2018 tubtob 2024 amo ang kantidad nga gingamit sa pagpatukod sang Philippine Offshore Gaming Operations (POGO).
Sa nasambit nga hearing makapila ka beses nga ginpanindugan ni Guo nga ang nasambit nga kantidad ang gingamit sa pagpahimo sang iya nga farm.
Indi man mapahayag ni Guo kun sa diin naghalin kag nagkadto ang kwarta.
Ginpasiguro naman ni Guo nga iya ihatag ang record nga ginapangita sang committee kag indi niya ini masabat sa hearing bangud nagapangatubang na ini sang 87 counts sang money laundering nga kaso sa Anti Money Laundering Committee.
