Posible nga mabalik na subong nga adlaw ang linya sang kuryente matapos nga nagcollapse ang power transformer nga nagresulta sang masobra 24 oras nga power outage sa coverage area sang Alijis Substation.
Miyerkules sang gab-i nag-umpisa ang blackout kun sa diin apektado ang pito ka mga Feeders nga konektado sa Alijis Substation kag nagdangat sa 47 mil nga mga consumers ang apektado.
Suno kay Engr. Bernard Bailey Del Castillo, Chief Operating Officer sang Negros Electric and Power Corporation (NEPC) amat-amat naman nga gin-attach ang Alijis feeder sa iban nga substations.
Ang Alijis feeder 1, feeder 2, feeder 4 kag 6 ang online na samtang ang Alijis feeder 3 naman ang padayon pa nga ginakay-o.
Suno kay Del Castillo, madamo sang challenges sa feeder 3 amo nga madugay ang pagtrabaho nga ma-attach ini sa Murcia Substation.
Pahayag sini, 7 km ang linya nga dapat iangot sa Murcia feeder kag may mga blockage kag re-routing pa nga ginpatigayon, amo nga gin-extend ang timeline sa restoration sini.
Ginalauman naman sini nga subong nga udto ukon karun sa hapon, posible na nga matapos ang feeder extension sang feeder 3, apang may yara sang matabo nga load dropping para mapabilin nga estable ang system.
