Kapin alas-2:00 bwas sa kaagahon pa mapaabot ang pagbalik sang kuryente sa mga areas nga ginacater sang Alijis Feeder 3.
Sa interview sang Bombo Radyo Bacolod kay Negros Electric and Power Corporation (NEPC) Spokesperson Jonathan Cabrera, ang bag-o kag mas madamol nga cable wire nga ila nga ginlatag ang nakalab-ot na sa banwa sang Murcia.
Paathag sini nga una na nga na-energize ang iban nga mga Feeders sang Alijis Substation matapos nga gin-angot sa mga katupad nga Substations.
Apang bangod nagatie-up, sila ang kun kaisa nagapatigayon sang rotational outages ukon load dropping agud indi mag-overload ang substation nga temporaryo nga ginpakig-angotan.
Samtang, wala naman gilayon nabalik ang kuryente sa Alijis Feeder 3 bangod nagadangat pito ka kilometros ang ila ginlatagan sang linya agud maangot sa Murcia Substation Feeder 1.
Suno diri karun sa hapon, makompleto na ang linya apang indi gilayon mapatigayon ang energization process.
Paathag ni Cabrera nga indi nila makapatigayon sang energization sa peak hours kag kinahanglan ang off-peak nga alas-11:00 sang gab-i.
Kinahanglan naman nga patyon ang power supply sa Murcia Feeder 1 samtang ginakonekta ang linya kag ini ang ginabanta nga magalawig sang tatlo ka oras.
Samtang sila ang magapatigayon man sang monitoring agud nga maseguro ang estable nga power load sa Alijis Feeder 3 kag Murcia Feeder 1.
