Fully energized na ang Alijis Substation kag sa karun 100 percent na nga nabalik ang kuryente sang kapin 47 mil nga mga kunsomidor nga naapektuhan.
Sa interview sang Bombo Radyo kay Jonathan Cabrera, pokesperson sang Negros Electric and Power Corp. (NEPC), nagpasalig ini nga supesyente na ang supply sang kuryente.
Suno diri, na-energized na ang Ten MegaVolt Amperes (10MVA) nga mobile substation nga ginbyahe pa gikan sa Iloilo padulong diri sa ciudad sang Bacolod.
Kaina sang alas- 09:53 sang aga, natigayon nga nabalik ang supply sang kuryente.
Suno diri, wala na sang may matabo nga rotational brownout kun sa diin ginahatagan lamang sang tag-apat ka oras ang mga consumers para marotate ang paghatag sang supply.
Nakakas naman sa karun ang 13 anyos nga power transformer nga nagcollapse sang Miyerkules kag ini ang nabaylohan na sang bag-o.
Ang bago nga transformer ang may capacity nga 12 megawatts nga mas mataas kun ikumpara sa daan nga transformer nga may yara lamang sang 9.3 megawatts.
Ginalauman naman nga ma-energized na ang 18 million MegaVolt Amperes nga transformer sa Setyembre 2 ukon 3.
Kag kasunod sini mahimo na nga masaylo ang mga feeders sang Alijis substation diri para indi na mag-tie up pa sa iban nga feeder.
Pahayag ni Cabrera, ginatsekyar sang NEPC ang pagbalanse sang loads kag sila nagabantay nga indi na maliwat ang natabo nga malawig nga power outage.
Dugang pa sini, may plano kag preparado ang NEPC- financially kag technically apang ang rehabilitation process ang indi matapos sa madali nga tion.
