Ginpasalig nanday Bacolod City Mayor Greg Gasataya kag Congressman Alfredo “Albee” Benitez nga wala sag matabo nga water disruption sa Bacolod City.
Ini kasunod sang ginpagwa nga statement ni Bacolod City Water District (BACIWA) Chairman Atty. Sonia Verdeflor nga nagapanugyan sa mga Bacolodnon nga magtipon na sang madamo nga tubig bangod sa posibilidad sang pag-untat sang pagsupply sang Bacolod Bulk Water Inc. sa Lunes.
Sa statement ni Benitez, ginpanugyan sini sa mga pumuluyo nga mangin kalmado lamang bangod magapadayun ang supply sang tubig.
Suno sa kongresista, may pasalig na sa iya ang PrimeWater nga isettle nila ang tanan nga balayran sa mga water suppliers kalakip na ang BBWI subong nga adlaw.
Pasalig ni Benitez nga ang Office of Congressman ang may close coordination sa Bacolod City Government partikular na kay Mayor Greg Gasataya kag sa Sangguniang Panlungsod, kasubong man sa BACIWA, BBWI, PrimeWater, kag iban pa nga concerned parties agud maseguro nga indi matabo ang ginakahangaw-an nga pagkadula sang tubig.
Ginapanugyan sini sa BACIWA nga mangita sang tanan nga available legal remedies agud maprotektahan ang interes sang publiko.
Kasubong man nga panugyan sini nga tindugan ang kinamatarong santo sa layi kag sa ila kontrata, agud maseguro nga mapabilin nga estable ang water supply sa ciudad.
Panawagan sini sa tanan nga partido nga indi magpadaso daso sa pagpagwa sang public statements kag indi magtuga sang panic kag pagkabalaka sa mga pumuluyo.
Nagpagwa ma sang kaangay nga pasalig si Mayor Greg nga nagpahayag nga may commitment na ang PrimeWater sa gilayon nga pagbayad sang obligasyon.
