Ginapatun-an sang alkalde sang ciudad sang Bacolod ang pagpatuman sang mga penalidad sa idalom sang city ordinance batok sa mga irresponsable nga mga indibiwal nga nagahaboy sang basura.
Nahibaluan nga kahapon ang city government ang nagpatigayon sang clean up drive sa creek sa Barangay Bata, kun sa diin nagdangat sa 17 ka tonelada sang basura ang nahakot.
Samtang nagdangat naman sa 11 ka tonelada ang nakaligad nga clean up drive sa creek sang Barangay Banago.
Nagpatigayon man sang clean-up drive ang katapo sang Bureau of Fire Protection sa Bredco port, kun sa diin sila ang nakakuha man sang sinako nga basura.
Ang clean-up drive sa mga waterways ang ginahimo sang ciudad bilang isa sa mga solusyon sa pagbaha sa ciudad sa tion nga mag-inulan.
Sa interview sang Bombo Radyo Bacolod kay Bacolod City Mayor Greg Gasataya, ang problema sa pagbaha ang indi man gulpiyada nga masolbar kag ini ang nagakinahanglan sang suporta sang tanan.
Suno kay Gasataya, bisan ano pa ka paninlo sang ciudad kun ang mga tawo ang wala man sang disiplina sa insakto nga paghaboy sang basura ang problema ang magasulit-sulit lang.
Suno diri, ginapatun-an niya ang penalty aspect sang city ordinance para sa anti-littering.
Suno sa alkalde kinahanglan na nga magpatuman sang penalidad bangud indi mahimo nga ang ciudad ang magapaninlo lang kag pabay-an lang ang mga padayun nga nagahaboy sang basura.
Naga-apelar si Gasataya sa tanan nga residente kag nagapadulong sa ciudad nga mangin responsable sa pahaboy sang mga basura.
