Magahinun-anon si Bacolod City Mayor Greg Gasataya sa Filipino-Chinese community angot sa imbestigasyon sa pagpatay sa negosyante sa Bacolod Downtown area kaupod sa pamunuan sang Bacolod City Police Office.
Sa interview sang Bombo Radyo kay Secretary to the Mayor Atty Marty Go, diskusyunan man ang pagseguro sang safety sang iban pa nga mga Chinese businessmen.
Pahayag ni Go nga sang matabo ang pagtiro patay kay hardware owner kag contract supplier Engr Romie Li, gilayon man nga nakighinun-anon si Mayor Greg kay BCPO Director Police Col. Joeresty Coronica.
Gin-estoryahan nila indi lamang ang pagsolbar sa kaso kasubong man ang pagprotekta sa palangabuhian sang mga Filipino-Chinese businessman sa Bacolod.
Apang kahapon nagtawag ang Filipino-Chinese Community nga nagarequest nga makahinun-anon ang alkalde kag BCPO.
Bangod wala pa makapauli sadto si Mayor, ginschedule ang pagsugilanon subong nga hapon.
Ginapahayag nga kapin 20 ka miyembro sang Filipino-Chinese community partikular na ang pila ka prominente nga negosyante nga makabahin sa dialogo.
Apang paathag ni Go nga bisan wala nagrequest sang dialogo, si Mayor Greg ang magahimo sang tikang para mapadasig ang imbestigasyon kag mapabilin ang security sa mga negosyo sa ciudad.
