May gintukod na nga fact-finding team ang Bago City Government agud mag-imbestigar sa kamatayon sang ginbun-ag nga lapsag sang Pebrero 18.
Madumduman nga naglupok ang balita matapos magpost sa social media ang amay nga si Patrick Saylo residente sang Barangay Taloc, Bago City, nga nagapanawagan sa ospital nga ayuhon ang serbisyo.
Nahibaluan nga nadulaan sang kabuhi ang bag-ong bun-ag nga baby boy sang ginpabata si Jennifer Saylo, 45 anyos, Grade 3 teacher.
Gina-alegar sang bana nga caesarean section dapat ang iya asawa apang ginpilit sang ospital ang normal delivery.
Sa interview sang Bombo Radyo Bacolod kay Bago City Mayor Nicholas “Nico” Yulo, siya ang nagapakig-unong sa nalisdan nga pamilya partikular na sa iloy.
Ginakasubo sini ang natabo sa Bago City Hospital, kag pasalig sang alkalde nga siya ang magabulig sa pamilya.
Apang aminado ang alkalde nga indi ini basta-basta makalumpat sa ano man nga desisyon, kag may-ara sang standard operating procedure ang ciudad sa kaangay nga hitabo.
Una diri ang pagconvene sang fact-finding committee, nga pangunahan sang City Legal Officer.
Lantawon sang mga ini ang detalye sang insidente agud matumod kun may kapaslawan gid man ang mga personnel sang ospital.
Una naman nga nakahinun-anon ni Mayor Yulo ang Chief of Hospital kag ini ang naghatag na sang incident report.
Apang aminado ang alkalde nga wala sini maid-idan sang basa ang report kag ini ang gintugyan na sa fact-finding team.
